"Until the lions have their own historians the history of the hunt will always glorify the hunter...."
- Chinua Achebe

2017, ഒക്‌ടോബർ 18, ബുധനാഴ്‌ച

കല്ലറ സുകുമാരന്‍ അനുസ്മരണം - എ.പി. വേലായുധന്‍ കോഴിക്കോട്



വെള്ളിമാടുകുന്നെന്ന എന്റെ ഗ്രാമത്തില്‍ 1975-ല്‍ ഹരിജന്‍ സമാജം സംഘടിപ്പിച്ച ഒരു യോഗം കേള്‍ക്കാനിടയായതുമൂലമാണ് ഞാന്‍ സാമൂഹ്യ പ്രവര്‍ത്തനത്തിലേയ്ക്ക് എത്തി ചേര്‍ന്നത്. 

അന്നത്തെ യോഗത്തില്‍ വച്ചാണ് ഹരിജനങ്ങള്‍ക്കു പ്രത്യേക പ്രശ്‌നങ്ങളുണ്ടെന്നും അവ പരിഹരിക്കുവാന്‍ ഇങ്ങനെ കുറേ നേതാക്കള്‍ ശ്രമിക്കുന്നുണ്ടെന്നും മനസ്സിലാക്കിയത്. അങ്ങനെയാണ് ഞാന്‍ ഒരു സാമൂഹ്യ പ്രവര്‍ത്തകനായത്. ഭരതേട്ടന്‍, രാമുണ്ണി മാസ്റ്റര്‍ പിന്നെ രാമേട്ടന്‍. ഞാന്‍ രാമേട്ടന്റെ കൂടെ നിന്നു. ജനങ്ങള്‍ക്കൊരു പ്രശ്‌നമുണ്ടായാല്‍ ഓടി എത്തുന്ന ആള്‍ രാമേട്ടനായിരുന്നു.

1975-ല്‍ ഹരിജന്‍ സമാജവും കെ.എച്ച്.എഫും തമ്മില്‍ ലയിക്കുവാനുള്ള ലയന സമ്മേളനം കോഴിക്കോട്ട് ടൗണ്‍ ഹാളില്‍ ചേര്‍ന്നു. ഡി.പി. ആണ് സ്വാഗതം പറഞ്ഞത്. എം.എ.കുട്ടപ്പന്‍, പോള്‍ സാര്‍ മുതലായവരൊക്കെ പങ്കെടുത്തു. ആ യോഗത്തില്‍ കല്ലറസാറിന്റെ പ്രസംഗം കേട്ടപ്പോള്‍ ഞാനിതുവരെ പ്രവര്‍ത്തിച്ചതൊന്നുമല്ല ശരിയെന്നു തോന്നി. നാള്‍വരെ കേട്ടതില്‍വച്ച് ഏറ്റവും ഉജ്വലമായ പ്രസംഗമായിരുന്നു കല്ലറയുടേത്. അപ്പോഴെനിക്കുതോന്നി കല്ലറസാറിന്റെ കൂടെ ചേരണമെന്ന്. 1982-ല്‍ പന്തലായനി ബാലന്റെ അനുസ്മരണ സമ്മേളനത്തില്‍ ഞാന്‍ പങ്കെടുത്തു.

കെ.റ്റി. ധനപാലന്‍, ബാപ്പുട്ടി, ഐ.ഡി.എഫ്. ജില്ലാ പ്രസിഡന്റായിരുന്ന ശശീന്ദ്രന്റെ അമ്മ കാര്‍ത്യായനി. അവരെ പ്രത്യേകം എടുത്തുപറയേണ്ട ആളാണ്. ഞങ്ങള്‍ക്ക് നേതൃത്വം തന്ന സ്തീയാണ് കാര്‍ത്യായനി.

ഞാനൊരു ഐ.ഡി.എഫ്. കാരനാണെന്നു പറയും ഐ.ഡി.എഫ്. ഒരു സമുദായ പ്രസ്ഥാനമല്ല. വിമോചന പ്രസ്ഥാനമാണ്. ഞാനതിന്റെ തത്വത്തിലാണ് വിശ്വസിക്കുന്നത്.

അംബേദ്ക്കരുടെ മാത്രമല്ല, ലോകം മുഴുവനും കറുത്ത വര്‍ഗ്ഗക്കാരോടു ഐക്യദാര്‍ഡ്യം പ്രഖ്യാപിക്കുന്ന വിമോചന പ്രസ്ഥാനമെന്ന നിലയിലാണ് കല്ലറസുകുമാരന്റെ ആദര്‍ശത്തെ ഞാന്‍ കാണുന്നത്.

ആ ഐഡിയോളജിയിലാണ് ഞാന്‍ അദ്ദേഹത്തെ കാണുന്നത്. ഒരു ചെറിയ കുട്ടി ഒരു ചോദ്യം ചോദിച്ചാല്‍ വളരെ ലളിതമായി ശാന്തമായി അദ്ദേഹം ഉത്തരം പറയും, ഒരു ചിന്തകനെന്ന ഭാവമില്ലാതെ.

അംബേദ്ക്കര്‍ ശതാബ്ദിയോടനുബന്ധിച്ച് ആളുകള്‍ ഒരു സ്വാഗതസംഘം ഓഫീസ് ഉണ്ടാക്കി. ചെറിയ ഒരു ബഞ്ചില്‍ കല്ലറസാര്‍ കിടന്നുറങ്ങും. 

ഭക്ഷണം കഴിക്കാന്‍ കൂട്ടികൊണ്ടുപോകുന്നവരോട് കയ്യില്‍ കാശുണ്ടോ എന്നു സ്‌നേഹത്തോടെ ചോദിക്കും. ആ ചോദ്യം കേള്‍ക്കുന്നവന്‍ കാശില്ലെങ്കിലും എന്തും വാങ്ങികൊടുക്കാനുള്ള മനസ്സുകാട്ടും.

വളരെ പ്രതിഭാധനനായ കല്ലറയ്ക്ക് തന്റെ പ്രത്യയശാസ്ത്രം വിജയത്തിലെത്തിക്കുവാന്‍ സാധിക്കാതെയായി. അംബേദ്ക്കര്‍ പ്രത്യയശാസ്ത്രത്തിന്റെ പടയാളിയും സേനാനായകന്‍ എന്ന നിലയിലും കേരളത്തില്‍ അത് പരാജയപ്പെട്ടപ്പോള്‍ പരാജയപ്പെട്ട ഒരു യുദ്ധത്തിന്റെ നായകന്‍ എന്ന നിലയില്‍ ഉത്തരവാദിത്വം അദ്ദേഹത്തിനുണ്ടോ? അദ്ദേഹത്തിന്റെ പ്രായോഗികതയിലുള്ള വീഴ്ചകള്‍ എന്ന നിലയില്‍ നിങ്ങള്‍ കാണുന്നുണ്ടോ?

ഇല്ല.

പിന്നെ എന്താണ്?

അദ്ദേഹത്തോടൊപ്പം നിന്നവര്‍ അതിനനുവദിച്ചില്ല എന്നാണ് എന്റെ സംശയം.

ലോകത്തിലെ അടിമകളുടെ പോരാട്ടചരിത്രം പരിശോധിച്ചാല്‍ അങ്ങനെയുള്ള കാര്യങ്ങള്‍ ഉണ്ടല്ലോ. അതൊക്കെ അതിജീവിക്കാന്‍ അദ്ദേഹത്തിന് കഴിഞ്ഞല്ലോ.

അദ്ദേഹത്തിന് സാമര്‍ത്ഥ്യമുണ്ടായിരുന്നു. അദ്ദേഹത്തിന്റെ അനാരോഗ്യവും സാമ്പത്തിക പരാധീനതയും ഒരു കാരണമായിരുന്നു.

അദ്ദേഹത്തിന്റെ മരണം ദലിത് പൊതുരംഗത്തെ ഒരു ശൂന്യതയാണ്.